Cili do të jetë dështimi i radhës?!

Shkruan: Florim Zeqa

Pas prishjes së koalicionit qeverisës

Këtë shkrim do ta filloj me një thënie të vjetër popullore: "Nëse bie me fjet në shtrat me fëmijë, në mëngjes mund të zgjohesh i lagur"! Disa sikur (qëllimshëm) po harrojnë se për këto 18 vite, me përjashtim të një gjysmë mandati kanë fjetur në të njëjtin shtrat (qeverisje) me fëmijët e llastruar, të lagur e zhytur në pisllëqe të shumta,...atëherë aty nuk bëhet më fjalë për pastërti. I kuptoj shpirtrat e virgjër të LDK-së, që kërkojnë unifikim dhe bashkim të elektoratit rugovian në prag të këtyre zgjedhjeve të kurdisura nacionale, por në asnjë rrethanë nuk i akceptoj djallëzitë e atyre që deri dje fjetën në të njëjtin shtrat me fëmijët e "lagur", ndërsa sot paturpësisht po thonë se "atyre" u vjen era kështu e ashtu, duke harruar se edhe vetë janë duke kundërmuar të njëjtën erë. Arsyetimet mund të gjenden nga më të ndryshmet, por faktet gjithnjë janë më të fuqishme dhe të pamëshirshme ndaj tendencave djallëzore për mashtrimet e radhës. E kam një thirrje shpirtërore për të gjithë qytetarët e Republikës së Kosovës. Ta duam dhe respektojmë njëri-tjetrin jo sipas fjalëve, por sipas veprave. Vetëm duke respektuar vlerat e njëri-tjetrit, besimin dhe përcaktimin e lirë dhe sovran të njëri-tjetrit i krijojmë standardet e një shteti të lirë dhe sovran.

Të mos ndahemi e përçahemi për parti politike

Mendimi ndryshe është vlerë, kritikat, këshillat dhe sugjerimet e tjerëve t'i pranojmë me dashamirësi. Asnjëri në këtë botë nuk jemi të përkryer, secili ka diçka më shumë dhe diçka më pak se tjetri. Bashkëkombës të dashur, vëllezër e motra shqiptare, të mos ndahemi e përçahemi për parti politike, për interesa të liderëve partiakë, as për koncepte ideologjike, por të bashkohemi me njëritjetrin për kauzën e shtetndërtimit, mbrojtjen e interesave vitale të shtetit tonë, sikur janë sovraniteti dhe integriteti territorial, elemente këto që klasa aktuale politike i ka vënë në pazar në bisedime me armiqtë e shtetit tonë në Bruksel. Madhështia e njerëzve dallohet në momentet e vështira, në tejkalimin e situatave pa sharje e fyerje ndaj njëritjetrit. Sikurse çdo gjë që ka fillimin dhe mbarimin e vet, edhe koalicionet politike e kanë fillimin dhe mbarimin e tyre. Jo rrallë, koalicionet dhe kurorat qeverisëse përfundojnë para kohe dhe në mënyrë të njëanshme, duke i shkaktuar hidhërim dhe "plagë" të pashërim partnerit tjetër. Kështu ndodhi edhe kësaj radhe, fitoi shkathtësia politike ndaj ambicieve dhe dëshirave. Edhe kësaj radhe, për të satën herë u vërtetua ajo maksima e vjetër për politikën, si "art i së mundshmes". Të paaftit politikë, shkaktarët e prishjes së kurorës së panatyrshme qeverisëse po i akuzojnë si tradhtarë e besëprerë! Në raste të tjera mbase do të ishin normale konstatimet e tilla, por kurora e fundit qeverisëse nuk ka pasur mundësi të përfundojë ndryshe, ngase parimet bazë të lidhjes se asaj kurore kanë qenë të bazuara pikërisht mbi interesat e ngushta personale dhe elementet e tradhtisë dhe pabesisë njerë- zore. Të paaftët politikë, krahas meritave që po ia atribuojnë vetes përgjatë qeverisjes trevjeçare, duhet të jenë të gatshëm të pranojnë edhe përgjegjësitë për dështimet e përbashkëta në qeverisjen e vendit. Edhe po deshën, nuk do mund ta pastrojnë aq lehtë veten e tyre ashtu sikur po trumbetojnë. Pasi vetë fillimi i koalicionit PDK-LDK brenda natës ishte një sinjal ogurzi për të ardhmen e vendit dhe LDK-së në veçanti, mirëpo e keqja më e madhe është tek katandisja e disa vlerave, të cilët për kënaqjen e egos së tyre personale për pak pushtet e privilegje u bënë bashkë me djallin....

Aderimi në parti politike

Fatkeqësisht, edhe përkundër abortit të dytë politik, LDK-ja edhe kësaj radhe nuk do të ndryshojë, lideri i saj nuk do t'i marrë përgjegjësitë që i takojnë, për të ikur nga kreu i saj. Të gjitha deklarimet se gjoja "nuk do të kandidojë sërish për postin e kryeministrit" janë lojëra ditore për të mashtruar elektoratin, por jo edhe kryesinë dhe të deleguarit në KP të LDK-së, sepse ata janë vasalët, mbështetësit e tij më besnikë,...e të cilët nesër prapë do ta kërkojnë kandidaturën e Isa Mustafës për kryeministër. Ngase, për të mos thënë të gjithë, shumica e eksponentëve të larte të LDK-së së sotme, në forma të ndryshme janë të lidhur me strukturat e SHIK-ut, duke filluar nga bizneset, tenderimet dhe punësimet e familjarëve të tyre,...të tillët në disa raste në shkrimet e mia i kam quajtur "Urithët e nëntokës së LDK-së, të cilët para opinionit, ditën shiten si rugovistë në LDK, ndërsa natën e kalojnë më Kadri Veselin, Hashim Thaçin, Xhavit Halitin, Adem Grabovcin, etj. Kjo është tepër e dhimbshme, por është e vërteta e hidhur e disa LDK-istëve të ditëve të sotme. Unë nuk shoh asgjë të keqe, prej atyre që publikisht aderojnë nga njëra parti në tjetrën, por e keqja e madhe është e atyre që ditën trupin e mbajnë në LDK, ndërsa natën, përveç shpirtit shesin gjithçka tek partitë e tjera për përfitime personale. Edhe pse tani akoma jemi në fazën e spekulimeve mediatike sa u përket lidhjeve të koalicioneve parazgjedhore, LDK-ja ndodhet në prag të dështimit të radhës, pra të një lidhje të re akoma më të panatyrshme, nga e cila përveçse më e dëmtuar, do të dali edhe më qesharake para opinionit publik dhe elektoratit të saj. Në rrethana normale, për të mos thënë e pamundur, do të ishte vështirë e realizueshme për LDK-në, por shkaku i kapjes së tmerrshme të saj nga grupet e interesit është e mundur të ndodhë çdo gjë. Mosrespektimi i programeve, koncepteve dhe parimeve bazë, shumë nga subjektet politike do t'i nxjerrë nga shtrati i tyre politik. Do të ishte mirë për të ardhmen e vendit, që liderët partiak t'u qëndrojnë besnik parimeve dhe deklarimeve të tyre publike të dhëna menjëherë pas prishjes së koalicionit PDK-LDK, në të kundërtën përveçse do t'i dëmtojnë partitë e tyre, do t'i lëndojnë proceset demokratike dhe do të rrezikojnë të ardhmen e vendit nesër, ngase shumë procese (të nisura) të dëmshme për vendin pritet të vazhdojnë nën qeverisjen e re, gjegjësisht në legjislaturën e gjashtë të Kuvendit, si janë; Demarkacioni me Malin e Zi, Asociacioni i komunave serbe, finalizimi i Gjykatës Speciale, etj. Dukuri e pazakontë është duke ndodhur edhe me aderimin e disa figurave të njohura publike (analist të pavarur dhe gazetar) nëpër partitë e ndryshme politike, e me të cilat deri dje kanë pasur mospërputhshmëri të plotë konceptuale! Edhe pse në parim, aderimi në një subjekt politik është krejtësisht çështje personale, kur janë në pyetje figura që deri dje kanë reflektuar shpresë për ndryshime pozitive në vendin tonë, me kalimin e tyre tek subjektet aktuale, përfundimisht janë shuar bashkë me vizionet e tyre për ndryshim. Ashtu siç e fillova, shkrimin do ta përfundoj me një thënie të këtyre ditëve të profesor Anton Kolajt, njëri ndër themeluesit dhe nënkryetar i LDK-së rugoviane të viteve të '90-ta, po citoj: "Duke i përcjellë zhvillimet parazgjedhore në skenën politike kosovare, më saktë aderimet, aterimet, hidhërimet, ndarjet, ribashkimet, sharjet, lavdërimet , driblimet, nderskamcat, bërrylat, fishkëllimat, etj, kam ardhur në përfundim se në Kosovë, parimet dhe platformat politike janë të vdekura. Sa vështirë do e kenë ata që dinë më i kuptuar programet dhe vlerësojnë parimet".

(Kosova Sot)